Conversa:Eleccións ao Parlamento de Galicia de 2024
Este artigo foi elixido como un artigo destacado sobre Galicia na portada. A proposta e votación correspondente atópase nesta páxina. |
Caixa de información e outras observacións xerais[editar a fonte]
Ola, quería expoñer unha serie de observacións sobre aspectos que considero poden mellorar o artigo:
- Na caixa de información creo que habería que retirar a información sobre VOX, xa que é unha forza política sen representación parlamentaria. É certo que VOX conseguiu moitos máis votos e maior porcentaxe que DO en Galiza (non así na provincia de Ourense), mais tamén é certo que a mesma situación aplica a Sumar e esta si que non aparece no cadro (tivo case 13 000 votos máis e un 1,92 fronte ao 1,03 de DO). Doutra banda, creo que podería estar ben incluir o logo das eleccións ao principio da caixa en lugar de no corpo do artigo.
- O queixo que aparece na sección "Enquisas e debates electorais" é confuso. As cores empregadas no gráfico non se corresponden coas do partido ao que pertence a candidata ou candidato, de feito a primeira vez que o vin pensei que o gañador do debate fora o candidato do PSdeG, xa que Pontón aparece en vermello, que é a cor dos socialistas. Do mesmo xeito, a parte do queixo destinada á opción "Non sabe/non responde/en branco" debería estar en gris, que é como adoita poñerse. Descoñezo o modelo, por iso non o fixen eu mesmo.
- Considero que sería moi positivo engadir un cadro coas enquisas realizadas, como se fixo nos artigos dos procesos electorais anteriores. Cumpriría tamén unificar a nomenclatura, xa que hai artigos nos que a sección aparece como "Sondaxes" e outras como "Enquisas". Moi interesantes todas as táboas que presenta a Wikipedia en lingua inglesa.
- Sería igualmente positivo engadir algunha imaxe de mitins, carteis electorais, casetas informativas, algún colexio durante a xornada electoral... mesmo na sección "Movementos previos á convocatoria electoral" unha imaxe de Feijoo e Rueda, os dous presidentes da anterior lexislatura: o que gañou as eleccións anteriores e o que convocou as eleccións sobre as que trata este artigo.
- A sección "Enquisas e debates electorais" creo que habería que dividila en dúas distintas: por unha banda as enquisas (incluíndo o cadro que mencionei anteriormente) e por outra os debates. Tal e como está agora hai unha parte ampla na que se fala de enquisas e o debate da TVG, e logo unha sección chamada "Debates" que se reduce a unha táboa. Non sei canto se falou dos outros dous debates, pero supoño que algo se poderá dicir deles, e por suposto engadir o que se pon do debate da TVG na sección "Debates".
- A sección adicada á xornada electoral podería ser máis completa, hai texto na Wikipedia en castelán que poderiamos traducir (ou preferiblemente redactar un nos mesmos), e engadir as imaxes co mapa de participación por comarcas que hai nesa Wikipedia.
- Dentro do artigo da Wikipedia en castelán teñen unha sección na que se pon á lectora en antecedentes con datos dos procesos electorais inmediatamente anteriores (municipais e españolas de 2023), considero unha sección así moi interesante.
- Considero que faltan algunhas referencias, principalmente na sección que fala da noite electoral, mais tamén nas enquisas (pode solucionarse simplemente coa inclusión do cadro do que xa falei), a campaña e a visión xeral.
- A introdución do artigo é demasiado curta.
Un saúdo, Piquito (conversa) 26 de febreiro de 2024 ás 10:36 (UTC)
- Ola, @Piquito. O de que non apareza SUMAR e si VOX, penso que se debe a que SUMAR non ten artigo de seu e non ten Q en Wikidata. Coido que os datos que aparecen na caixa de información son arrastrados dos daros existentes en Wikidata (de aí, todo o traballo realizado nos meses anteriores sobre a Infotaula de "Xeografía Política".Tamén concordo que a introdución é algo curta para o conxunto do artigo. Malia a iso penso que pode valer, sobre todo pola actualidade, como artigo destacado. Se se fose corrixindo e aumentando un pouco máis, podería valer tamén como artigo de calidade. Saúdos. MAGHOI (conversa) 28 de febreiro de 2024 ás 19:53 (UTC)
- Grazas pola túa resposta, MAGHOI. Eu non digo que teña que aparecer Sumar, nin moito menos (pode que me explicara mal), o que digo é que ningún partido máis aló do PP, BNG, PSdeG e DO debería aparecer na caixa porque non teñen representación, e se poñemos a VOX debemos poñer a Sumar, Podemos, PACMA, Escanos en Branco… porque a nivel representación están todos eles ao mesmo nivel.
- Doutra banda non entendo por que hai unha sección de candidaturas cunha táboa dividida nas que teñen representación parlamentaria e as que non, pero logo haxa unha sección para “outras candidaturas”… que outras candidaturas? Por que están a outro nivel? Deberían aparecer todas as candidaturas en igualdade, se se quere diferenciando as que partían con representación parlamentaria e as que non, pero esa separación que hai actualmente paréceme, por chamalo dalgún xeito, “clasista”.
- Para min destacar este artigo foi precipitado, entre outras cousas, porque tiña seccións sen contido porque realmente o proceso non acabou e o presidente da Xunta non foi aínda nomeado.
- Un saúdo, Piquito (conversa) 2 de marzo de 2024 ás 10:26 (UTC)