1492 (MCDXCII) foi un ano bisesto comezado en domingo segundo o calendario xuliano, en vigor nesa data. En 1492 tivo lugar un dos feitos máis importantes da historia da humanidade: o descubrimento de América, que determinou o desenvolvemento dos seguintes 400 anos, caracterizados pola expansión europea por todo o planeta e a formación dos primeiros imperios globais. Por mor das consecuencias a longo prazo deste acontecemento, algúns historiadores consideran que en 1492 acaba a Idade Media e comeza a Idade Moderna.